留家抗疫生摩擦 千嬅被丁子高命令半夜執屋

楊千嬅與周柏豪前晚參與東華三院《LOVE actually LIVE actually》抗疫慈善演唱會，千嬅留家抗疫期間化身「多功能老婆」，親自下廚又教仔做功課。不過她坦言與老公丁子高在家日對夜對會多了摩擦，她笑言學識在快要吵架前「走位」，才能維持夫妻感情。

前晚壓軸出場的楊千嬅，訪問時自爆抗疫期間胖了十磅。她表示早前在家自我隔離，每天教兒子Torres做功課，充分感受做媽咪的壓力。她笑說：「成日聽人話小朋友溫書忌親人教，原來真係容易忟憎。」她教仔做功課，以為對方明白，誰知「聽唔入耳」，幸好現時安排老師到家中授課。

千嬅最近經常煮食，笑言因兒子叫到而學習下廚：「個仔話其他同學嘅媽媽會整飯盒畀佢帶飯，但我無，但我我唔可以用忙做藉口。」有指不少夫妻留家抗疫而增加摩擦，她認同說：「我自己走位，就爆時就要閃。老公（丁子高）係獅子座，好鍾意安排啲嘢畀我做，例如半夜12點嗌我執廚房、執阿仔個書架咁。」

柏豪囡囡牙牙學語

不過，千嬅透露兩公婆會一同煲劇抗疫：「《愛的迫降》同《梨泰院Class》都好睇！」同場的周柏豪透露囡囡已五個月大，開始牙牙學語︰「個女識畀手同轉身，但未嗌爸爸，佢見到我嗌『Un咕』，見到媽咪就叫『奶』。」

撰文︰Pauline

編輯：李潔盈

美術：梁政敏