揭患腦膜炎經歷 韓馬利︰一隻腳叉落鬼門關

韓馬利（Mary姐）今年八月患上腦膜炎，幸好休息養病後已漸漸康復。走出鬼門關的她昨日精神奕奕出席蘇志威的舞蹈學校活動，她坦言與病魔搏鬥時十分辛苦，後來更患上抑鬱症，幸得丈夫杜燕歌悉心照顧。

韓馬利昨日重提患病的日子，仍猶有餘悸︰「依家好咗好多，醫生話我一隻腳叉落鬼門關再拉番我上嚟。」她表示最初發燒兩天，以為小事，後來看醫生後即要入院︰「之前我不省人事，昏迷咗個幾星期。朋友話我好番係好彩，咁大年紀腦膜炎其實好危險，唔好以為兩三日唔退燒無乜嘢。」

嘗試享受慢活

Mary姐感激老公杜燕歌一路陪伴和照顧︰「嚇死佢呀，結咗婚30年未見過佢咁驚，好緊張好細心。」她在治療期間曾吊藥三星期，身體乏力又出冷汗，後來更發現患上抑鬱症要看醫生︰「我食緊血清素，要食半年，依家個人反應好慢，最少要半年先回復到。」她自言病發時輕了七公斤，現已增回五公斤︰「朋友叫我開心啲，但情緒低落自己控制唔到，食嘢都吞唔落。」大病初癒，她表示日後會享受慢活，亦感恩自己現在食得瞓得。

同場的譚嘉荃原定昨晚補辦處女個唱，但無奈決定再度延期至明年五月，她感激投資方願意畀足三次場租。

撰文︰Pauline

編輯︰李潔盈

美術︰梁政敏

攝影︰林良明