完成《HEART ATTACK》巡唱 林峯承諾出新歌

林峯剛於上海完成《HEART ATTACK巡迴演唱會》最後一站，他在演唱會尾聲預告，明年將有一個全新的大型巡迴演出。至於有傳今年12月與女友張馨月拉埋天窗，林峯未有回應。

今次巡唱行程緊湊，林峯要在個多月內完成澳門、佛山、上海站等演出，林峯在尾場依然保持極佳狀態，施展渾身解數，在「get wet」環節更加濕身爆衫爆肌，令全場觀眾血脈沸騰。當他跳上高空吊環時，於觀眾頭頂滑過，幾乎所有觀眾都站起來，有瘋狂歌迷更想把他拉下來，場面既驚險又搞笑。

而在分享環節，林峯直言有一點遺憾，「上海對我好重要，我十幾歲就喺上海學唱歌，當年教我嘅老師，因為身體不適，無法到現場看我演出，有一點遺憾，希望下次我再嚟上海，老師可以捧場。」

女友上海捧場

演唱會完畢，林峯表示十分開心，巡唱觀眾帶給他無限熱情，令他十分感動，也讓他更加想快些重拾當歌手的身份。他透露已計劃明年舉行全新大型世界巡迴演唱會，也會籌備新歌，「其實之前一直忙拍戲，根本無乜時間，好多大城市我都未去唱過，明年準備去多啲地方，同各地嘅歌迷朋友見面。」此外，有報道指女友張馨月亦有到上海捧場，被歌迷發現後也大方合照，林峯經理人就表示這些私人問題不作回應。

撰文︰Pauline

編輯：陳禮恒

美術：梁政敏