不負眾望封金像影帝 古仔送獎畀老竇賀壽

《第37屆香港電影金像獎頒獎典禮》前晚圓滿結束，出爐影帝、影后古天樂與毛舜筠（毛毛）齊齊出席慶功宴，成為三料影帝的古仔笑言會跟家人食飯慶祝，更將影帝獎座送給古爸爸做生日禮物。

大熱封帝的古仔前晚甫抵慶功宴，即獲夾道歡呼祝賀，他笑言心情OK，問他是否早已預料自己得獎？他說︰「唔好諗太多，我都無諗定要講咩，獎唔係一個人拎，係代表所有人嘅付出。」對於黃秋生在台上疑似揶揄成龍「只有中國電影」的言論，古仔也有留意，但認為每人都有自己的表達方法，秋生只是講出自己想講的說話，故不想作評論︰「我嘅諗法就係做好電影！」

他坦言得獎是不負眾望，自己會跟家人食飯慶祝。「下星期係爸爸生日，到時一齊慶祝，送個獎畀佢做禮物。」談到下個目標，古仔說會做自己想做的事，但自己瞓醒才想目標，不一定跟事業有關。

毛毛下廚謝票

出爐影后毛毛前晚心情相當興奮︰「老公同阿女都戥我開心，得到呢個獎好圓滿，作為一個演員辛苦咗42年，十年前得過女配角，依家女主角，真係好滿足。」她指戲中「兒子」凌文龍奪新人獎時，自己已感動到喊，「我有無獎唔緊要，但阿仔同我講叫我一定要拎到。」她承諾會連續七日七夜下廚，宴請曾經投票給她的朋友。

採訪︰Pauline

攝影︰林良明

編輯︰李潔盈

美術︰梁政敏