產檢「驚魂」

「我無諗過驗B鏈（乙型鏈球菌）係咁恐怖㗎！」剛從病房出來，就忍唔住發短訊畀老公。

「做咩事？」佢問。「我啱啱好似畀人通櫃咁，有少少失禁嘅感覺。」老公報以一個驚訝嘅emoji，然後安慰我，叫我唔好再諗。

我承認我咁講可能有啲誇張，可能係我一開始太睇小呢項檢查啦。

俗稱「B鏈」嘅乙型鏈球菌檢查，一般喺懷孕35-37周進行。雖然我一早知道呢項檢查需要喺陰道及肛門採樣化驗，由於等候期間健康院嘅廣播不斷強調呢項檢查好快、好簡單，所以令我掉以輕心。

無錯，驗B鏈的確唔需要好似做柏氏抹片（子宮頸細胞檢查）咁，將鴨嘴鉗放入陰道深處刮取樣本，只係以一支較粗身嘅棉花棒喺陰道口採樣，但過程難免會有啲唔舒服。

而Audrey最始料不及嘅係肛門採樣一part。原以為姑娘只需輕輕用棉花棒在屁眼一掃就搞掂，殊不知原來係要將棉花棒放入肛門攪拌先採到樣。雖然歷時只有十幾廿秒，但因為事先無諗過係咁，所以感覺難受。

直至離開健康院時，我仲猶有餘悸，但我知道呢項檢查係唔能夠避免，事關乙型鏈球菌係最常見引起初生BB嚴重感染嘅病菌，根據衞生署資料，引起嚴重發病和死亡率約有5-10%。

因此，若果檢驗結果呈陽性，醫護人員就會喺你分娩時，幫你喺靜脈注射抗生素，減低BB受感染嘅機會。為咗BB健康，媽媽惟有受少少苦啦。

（本欄逢周一刊登）