周慧敏微服出巡整蠱食客Sell個唱 粉絲︰鬼馬喇你！

「玉女掌門人」周慧敏（Vivian）近日孖KB（Kevin Boy）玩爆茶餐廳，夾計搞大龍鳳拍片整蠱食客，順道宣傳明年初紅館個唱加場，短片一日已錄得逾11萬點擊。樂迷們勁Buy一向斯文的Vivian勁玩得，高喊「我都想畀女神整蠱」！

出道30年的Vivian明年初舉行個唱，近日宣布加開一場，即1月26至29日共四場，更事先張揚會與王馨平、湯寶如大唱經典兒歌《美少女戰士》，令粉絲引頸以待，頭三場門票於上周一已宣布爆滿，可謂一票難求。

Vivian為個唱造勢，早前聯同11年開始的YouTube整蠱節目《玩爆你個腎》系列主理人KB殺入茶餐廳，一個扮微服出巡食茶餐，一個化身瘋狂粉絲搞搞震。

自爆與KB相識21年

多年來玩盡本地藝人的KB，除了強迫女神合照，又食對方口水尾兼強行「抄牌」（攞電話號碼），刻意留難Vivian。二人先後測試身旁食客的反應，當中一對中年男女就仗義幫Vivian解圍，另一位少女則嚇得Call男友前來壯膽，場面充滿真實感。

前日，Vivian在官方FB上載短片，並留言︰「唔排戲，即興先好玩，無諗到KB咁樣來賀我演唱會加場。」又自爆早在96年於澳洲表演，當時仍是學生哥的KB已為她打鼓，戲言大家睇住對方成長。網友們則對Vivian與KB的Crossover正評不絕，盛讚女神鬼馬，並指拍得好笑，正到爆。

撰文︰Steven、Pat

協力︰阿瑤

編輯︰黃寶恩

設計︰梁政敏