後孕期的3大敵人

各位孕媽媽，有發現懷孕期間身體有咩變化嗎？除咗個肚一日比一日大，或者你一早留意到，指甲長得快咗，頭髮濃密咗又甩少咗，嗅覺同味覺亦都敏感咗。

起初我覺得懷孕帶畀我嘅轉變都幾正面吖。哈，依家諗番起，實在要同自己講番句︰「少年你太年輕了」，因為難頂嘅事陸續有嚟。

中孕期開始，負面變化逐漸浮現。唔止暗瘡多咗，亦有皮膚敏感嘅情況，尤其小腿，一個唔小心就會抓出一撻撻紅印，搞到我唔敢着短褲出街，覺得好肉酸。醫生話其實係正常，叫我戒食刺激食品（如辣嘢、海鮮），多搽lotion保濕，但我覺得最重要都係自己忍手唔好抓。

及至後孕期，更出現尿頻、妊娠紋暴現及水腫三大問題。每次我覺得尿急到爆，幾經辛苦排長龍入到洗手間，都會不自覺哼起農夫首《雙喜臨門》︰「成日去廁所，但就嚟嚟去去得一滴……..」Exactly係我嘅寫照。

到皮膚敏感好番啲，換衫時又發現大腿、肚皮底下以至屁股，唔知幾時開始多咗無數紫紅色嘅裂紋，就算幾勤力搽肚紋膏，都無消散嘅迹象，其實都會幾沮喪。

一心諗住扮靚啲，打算着條裙出街，又發覺對腳腫過豬蹄，原先買嚟趁條裙嘅平底鞋亦都已經唔啱着，惟有換上一對格格不入嘅波鞋，仲要將鞋帶調鬆幾格。算啦，都係換番套運動衫落街。

雖然懷孕嘅日子唔好過，不過每當老公同我講︰「老婆辛苦啦，多謝你幫我生BB。」望下自己屋企，再幻想下小家庭即將由2人行變成3人行，其實，幾辛苦都係值得嘅。

（本欄逢周一刊登）