大肚婆逼港鐵

問大家一個問題，你認為一個女人要懷有幾多個月身孕，先會被「公認」為一個大肚婆？用我嘅經驗分享，係六個半月。答案係點得出嚟？其實間接由港鐵嘅乘客話我知，因為該個星期，居然連續三日有人讓座畀我，而在此之前，係一個都無。

先旨聲明，我唔係覺得大肚婆大晒，認為人哋應該「老奉」讓座畀我，始終每個人都有攰和有需要嘅日子，但都想借呢個機會，多謝所有曾向我伸出援手嘅陌生人。

作為一名住新界嘅打工仔，早已習慣逼港鐵返工，全程企足個幾鐘於我而言濕濕碎。不過自從有咗，明顯感受到身體大不如前，尤其早孕期階段，經常覺得攰和暈，但未夠三個月唔同得人講，又礙於自己未見肚，唔好意思同人爭位坐，真係有苦自己知。

有次，我只係打算搭車去九龍塘，當日車廂好逼，唔好話坐，連企都需要靠邊站；中途仲突然四肢無力、標冷汗，開始唞唔到氣、眼前發黑，我以為自己要暈了，就喺最後一刻，我聽見車門開咗，於是用盡氣力衝出去，搵張凳坐咗15分鐘，終於恢復元氣。類似情況發生過兩、三次，自此我寧願畀貴少少搭頭等，而我嘅隨身物品入面，亦多咗支水和一包葡萄糖。

其實我嘅狀況已經比唔少人好，有啲孕婦仲會經常嘔，甚至抽筋。相信各位懷胎十月嘅媽咪多少都經歷過上述階段。

雖然如今嘅孕媽媽睇落都好年輕，若果你有一日在車廂遇見佢哋，希望你都能諗一諗佢哋嘅需要啦。

（本欄逢周一、四刊登）