Shine15周年企劃 聲演《藍精靈》做番自己

Shine今年出道15周年，兩子計劃在紅館舉行紀念騷，不過申請了五次仍未有檔期，暫定要推至明年初才能成事。而他們最近也有新搞作，就是為電影《藍精靈︰迷失的村莊》配音，與蔡卓妍（阿Sa）齊齊化身藍精靈歷險。

來自比利時漫畫的《藍精靈》，近年多次把故事搬上銀幕，個個藍精靈性格不一，貪玩又愛反斗，在世界各地擁有無數粉絲。新片《藍精靈︰迷失的村莊》（Smurfs: The Lost Village）找來黃又南及徐天佑，分別為「論盡仔」及「智多星」配音，二人與阿Sa聲演的「美芝」到處歷險。

又南不諱言今次是一次「本色演出」，他自爆︰「我都幾似『論盡仔』，有好多大頭蝦事情，例如搵咗個銀包好耐，但原來一直放咗喺個袋度。」

而天佑也自認與「智多星」有不少相似之處，他坦言︰「我細細個已經鍾意自己砌小玩意，做啲小發明，所以現在入行後都鍾意搞創作。」天佑更分享小學時會把貼紙貼在磁石上，自製特色小飾物，然後賣給同學，果然有生意頭腦。

論盡仔去咗邊？

相隔14年，Shine再為動畫電影配音，有不少趣事發生，又南就自爆瘀事︰「我哋每次配音都要望住個mon計住時間，論盡仔其實好難認，成班（藍精靈）都係藍色，根本搵唔番自己。」不過，他們都大呼今次經驗好玩，希望日後再有機會為動畫配音。

撰文︰陳子楠

攝影︰林良明

編輯︰陳禮恒

設計︰K

Outfit : Paul Smith

Hair : Louis Tse@POPEIGHT

Makeup : Henry Tse@BigC styling