同定欣合照成焦點 展鵬自嘲下次行開啲

陳展鵬、譚俊彥、陳山聰等昨日現身將軍澳電視城，為新劇《天命》進行拜神儀式，祈求新春開工大吉。監製莊偉健趁新年開工，亦準備一大袋利市派給眾演員，場面非常熱鬧。

日前眾藝員相約去到無綫高層樂易玲家中拜年，大合照中赫然見到緋聞情侶陳展鵬和胡定欣企埋一齊，被問到是否偕定欣孖住去拜年？展鵬解釋當日收早，所以就去樂小姐家中拜年，他笑說︰「下次咪行開啲影囉！（有無去定欣屋企拜年？）去定欣度就要去好多同事屋企拜年，希望出年有時間去啦！」身旁的譚俊彥立刻替他解圍︰「去都去我度先啦！」

譚俊彥又指展鵬早前忙於拍劇集《同盟》，現終於有時間正式入劇組還債，事關展鵬之前拍劇時不慎扭傷頸，監製都跳拍了其部分，現在輪到展鵬要應付多場動作戲。

張頴康想再追個女

陳山聰與張頴康則透露他們將會到北京拍攝一場打戲，山聰表示在北京戲份只有數天，反而橫店的戲份則較多要留整個月。兩人同是跑步愛好者，他們已相約赴京期間一齊練跑，問到可擔心北京霧霾嚴重？山聰謂︰「要早啲跑囉，反而最煩係日夜溫差大，早晚凍，下晝好熱。」此外，談到山聰在劇集《乘勝狙擊》中與莊思敏有激烈床戲，他笑言之後還有幾場戲，問到女友是否已睇？他說︰「我就叫女友唔好睇啦，不過佢都睇咗。無乜反應，笑囉，知係假嘅，不過電視尺度已經算好大。」張頴康則酸溜溜謂︰「你就好啦，呢套劇我得Madam Lo（盧宛茵）咋。（有親熱戲？）有喊戲囉。」

張頴康自爆首次踏足北京，還說原本無打算到長城，但是有人跟他說「不到長城非好漢」，所以他堅持無論如何都要去。問他是否誓要做好漢？他笑謂︰「未達到呀，我想生多個女喎，生仔怕似我咁百厭。」

採訪︰Pauline

攝影︰林良明

編輯︰林梓添

設計︰梁政敏