星2代自己開IG 9歲魔童Chok過Chilam

明星玩FB、IG等社交網站作宣傳，早已不是新鮮事，反而網民對一眾星二代日常生活更加好奇。例如張智霖與袁詠儀的獨生子張慕童（魔童），玩IG短短半年，已狂吸2.8萬粉絲，人仔細細，人氣直逼父母。

現年9歲的魔童，盡得雙親真傳，眼大大相當靚仔。早前，Chilam一家三口歐遊時，一時興起玩FB Live，魔童即場踢爆媽咪靚靚去買手袋，更呼籲網民follow他的IG，搶盡老竇風頭。在魔童IG裏，大多是自拍照及平日生活點滴，他最近更迷上名為musical.ly的社交視頻，不停「咪嘴」拍片放上網，深情電眼加型爆台風，冧暈不少姐姐級網民。

唔准入娛樂圈

最搞笑是，魔童同樣有爸爸「Cool魔」風範，魔童一邊試戴太陽眼鏡一邊自拍，Chok爆神情獲網民讚型過爸爸。但Chilam早前表明反對囝囝入行，「阿仔發現IG好多followers，佢覺得好威、好有成就感。但演藝工作唔係咁樣一回事，好多時捱更抵夜，所以唔想佢子承父業。」

邱淑貞大女沈月靚爆鏡

邱淑貞與I.T老闆沈嘉偉的大女沈月，跟媽咪十足餅印一樣，首次現身公開場合已令外間驚為天人。沈月IG中相片不多，除風景相及大頭自拍外，更有與女神舒淇合照，祝福對方早前與馮德倫結婚。

撰文：李潔盈

編輯：林梓添

設計：梁政敏