《八時入席》添食100集 毛姐暗示年底散Band

無綫處境劇《愛．回家之八時入席》明晚播出第100集，一班主角包括黎耀祥、毛舜筠（毛姐）及陳國邦等昨日在尖沙咀一間菜館舉行「百日宴」，同賀劇集衝破100集。監製邵麗瓊及羅鎮岳更即場宣布劇集添食至200集。

《八時入席》邁向200集，意味着拍攝期到年底，不過兩位主角祥仔和毛姐都預告年底各有各忙，似暗示拍完200集就同觀眾講拜拜，毛姐更取笑祥仔：「佢要登台搵銀，又要去美國探個仔，好忙㗎！」她坦言明年的工作已排到密麻麻，即使無綫想再添食，時間上未必配合得到。

早在處境劇開拍前，毛毛已講過明年要去法國和日本繼續修讀藍帶廚藝證書課程，烹飪一向是她的最大興趣，暫定明年下半年起程。毛姐續說：「基本上明年全年都係返學，只係中間抽時間出席女兒畢業禮。」

祥仔否認兒子戀珍女

此外，記者連聲恭喜祥仔，事關近日有指祥仔的囝囝和李麗珍女兒許倚榕秘密拍拖，祥仔聞言後帶笑否認：「我老婆同阿珍係中學同學，由細到大兩個小朋友都有出席對方的生日會。個仔識多啲朋友都好，依家唔同我哋嘅年代啦，我讀書時真係好似未見過女人咁。」祥仔又說兒子已飛往美國準備開學，太太亦有陪他過去適應新環境。

採訪：Pauline

攝影：林良明

編輯：陳禮恒

設計：梁政敏