《29+1》演單身中女 周秀娜誠徵男友

回復單身多年的周秀娜，感情生活一直只聞樓梯響，娜姐昨日出席新片《29+1》開鏡儀式，鑑於其角色是個30歲的單身中女，一直渴望嘗戀愛滋味，娜姐坦言同樣恨拍拖，更歡迎任何單身男士主動追求。

彭秀慧獨腳戲舞台劇《29+1》即將搬上銀幕，周秀娜、鄭欣宜及BabyJohn等昨日在銅鑼灣出席新片開鏡禮，娜姐和欣宜不時細聲講大聲笑，老友鬼鬼，原來戲中兩人卻甚少對手戲。欣宜表示：「我哋都係飾演步向30歲嘅女仔，但心態上各有不同。」欣宜與BabyJohn飾演情侶，令到單身女主角對愛情可謂心癢癢，娜姐解釋：「我拍呢場戲喺海邊喊足兩日，就係覺得同欣宜有好大對比，好想搵個男仔拍拖。」

欣宜連環做婚禮姊妹

剛好30歲的娜姐剖白戀愛心態：「未到30歲就開始驚，始終覺得年齡上有轉變，但去到呢個年紀又無乜嘢。（係咪想搵結婚對象？）都係㗎，想搵一個了解自己嘅人。」

欣宜亦希望另一半懂得關心自己，又可以令自己開心，她表示：「做呢行要令人開心，所以都想身邊有一個咁樣嘅人。」問她們「這個人」是否仍未出現？兩人齊聲表示：「我單身㗎！歡迎任何男士追求。」她們又自爆身邊有不少同齡的朋友已經結婚，甚至已是幾個孩子的媽媽，欣宜苦笑謂，今年要做三次姊妹，見到朋友幸福，自己都不期然萌起結婚的念頭。

採訪：Pauline

攝影：林良明

編輯：陳禮恒

設計：鄧俊明