毛記惡搞《流淚呀？繼續做！》夠貼地 歌迷滾動安仔唱出打工仔心聲

近日許志安（安仔）為毛記電視拍攝勁曲金曲冠軍歌MV《流淚呀？繼續做！》，化身許員工的安仔惡搞自己的舊曲《流淚行勝利道》，唱盡萬千打工仔心聲。不少人喜見安仔夠貼地勁玩得；有人卻嫌MV製作簡單笑唔出！

30年前以新秀歌唱大賽亞軍身份入行的安仔，近日被揭陳年舊史，他與同屆季軍黎明在80年代的珍貴合照在網上無限翻Loop。當時年僅19歲、身形瘦削的安仔，一臉薯嘜，穿上「那些年」潮牌「Benetton」黃色衞衣坐在唇紅齒白的黎明身旁，明顯相形見絀。安仔太太鄭秀文（Sammi）日前被問到丈夫舊照在網上瘋傳時，也不留情面，嘲諷安仔樣子如同笠了絲襪出街。

罕有賣萌吸正評

近日，安仔乘勢為年輕人雜誌《100毛》惡搞舊照拍攝封面，更順道為毛記電視的勁曲金曲冠軍歌拍攝MV。早前Sammi轉Look做鄭經理宣傳信用卡；黎明則化身腦細下屬阿明硬銷白咖啡，今次輪到安仔變許員工坐在辦公枱前，演繹將舊曲《流淚行勝利道》譜上新詞的《流淚呀？繼續做！》，歌詞控訴老闆之餘，又帶出上班一族的無奈，似為基層打工仔發聲。

此外，雖然MV只得一分半鐘，但安仔罕有地賣萌，除了扮聽枱頭冇插綫的電話，又攞枱頭燈扮咪高峰哼歌，結尾時更忍不住偷笑。歌曲上載不足24小時已狂掃38萬點擊率。不少樂迷驚喜安仔肯迎合年輕人玩惡搞，激讚他唱出神髓；另一方面，有人卻狠批MV太簡單兼冇笑點。事實上，不少樂迷也期待鄭經理與許員工Crossover，未知日後許生許太可會考慮為毛記合體拍片。

撰文：Steven、Pat

協力：陳子楠

編輯：黃寶恩

插圖：何樂

設計：鄧俊明