有線幫霸地盤？ 翠如唔知陳倩揚離巢

黃翠如當年初入行時只是有線娛樂節目主播，後來跟余詠珊過檔無綫後立即彈起，除了繼續當主持，更初嘗拍劇滋味。反而港姐出身的陳倩揚早前「被離開」，因而傳出「有線人」成間接殺手傳言。

黃翠如昨日與魔術師甄澤權（Louis）到黃埔出席「小魔王挑戰賽」決賽時，被問到陳倩揚離開無綫，「有線幫」的翠如BB卻以為對方仍在無綫，她說：「我好鍾意倩揚，一入TVB佢就介紹我用咩皮膚敏感藥，希望倩揚有多啲嘢做，佢做戲好好睇，希望佢可以拍多啲劇。（佢離開咗TVB喎！）地球係圓嘅，好多人都返TVB，做任何電視台都唔緊要啦，最緊要做自己想做嘅。」

教男友食榴槤

另外，翠如BB表示曾學過魔術，但最厲害都只是變走錢幣，連男友蕭正楠（Edwin）都嫌未夠精采，她笑謂：「佢話變走錢幣呢啲魔術太過『流』，佢睇一半就走咗。」

翠如BB又透露剛從馬來西亞回港，嗜吃榴槤的她，此行可謂大快朵頤，不過一口氣吞掉20粒，卒之搞到肚痛，她笑笑口謂：「其實今次我買咗好多貓山王返嚟分畀親友，因為真係太抵，平過香港幾倍，（有冇同Edwin一齊食？）佢話自己會食，不過就冇喺我面前食過，我會教佢咩為之最好嘅美食。」

採訪：Pauline

攝影：林良明

編輯：林梓添

設計：梁政敏