楊怡露臍證未懷孕

羅仲謙、楊怡新婚不久，兩人已立即回港復工。近日有傳他們倉卒結婚，令人懷疑是否奉子成婚，但楊怡昨日宣傳《末代御醫》以露腰裝示人，看來是要用行動證明尚未有「餡」。

無綫劇《末代御醫》眾演員包括楊怡、敖嘉年、林子善及李綺雯等，昨日在藍田一間長者社區中心探訪老友記，又玩遊戲送禮物。人妻楊怡最受長者歡迎，不停獲邀合照。

事後問楊怡穿上露臍裝是否要粉碎懷孕傳聞？她笑言：「唔會刻意話畀大家聽，時間可以證明一切。（婚後不設防？）隨緣啦。」又強調不會停工專注生B，況且今年都趕不及「造人」，若意外懷孕呢？她竟笑說：「Touch wood，順其自然啦。」

至於遲遲未跟無綫動筆續約，楊怡透露月初已經約滿。問是否義務出席宣傳活動？她回應稱︰「唔可以話係義務，自己都希望（劇集）收視及口碑好，其實收視都OK。另一主角郭晉安唔喺香港，所以我要更加盡力宣傳。」

約滿無綫去向未明

至於TVB的工作是否告一段落？她說：「暫時啫，有適合工作會做，好多嘢仲傾緊，呢行好細，TVB始終係娘家。」有傳經理人已為她搭通天地綫北上發展？她表示：「有適合工作都會去試。（有跟內地製作公司接洽？）之前傾過，但要睇劇種再決定。（或者跟隨老公加盟星皓？）唔會，我哋工作好獨立，除非出席同一活動，都希望夫妻檔（掘金）。」

楊怡又稱刻下忙為年底舉行婚宴日子而煩惱，她甚至呼籲：「最好有酒席、婚紗贊助啦，總之𢱑得就𢱑啦。」

採訪：Pauline

編輯：陳禮恒

設計：鄧俊明