無官司一身輕 陳志雲否認過檔ViuTV

昨早天氣嚴寒，市區氣溫只得3度，不過陳志雲（Stephen）、毛舜筠（毛姐）、森美及Super Girls等仍出席在中環舉行的單車活動，但Stephen和毛姐就只現身支持，並沒有落場踩單車。

早前官司纏身的陳志雲，有傳會過檔全新免費電視台ViuTV，昨日被問到新動向，他就表示：「絕無此事，只係傳聞，我順便幫YT（俞琤）澄清埋，絕無此事，佢無特別新動向，真係退落嚟。就算將來工作，佢都唔係為賺錢，有回報會捐返出去，只係為公益。」

但是外傳Stephen會跟YT過檔，他堅決否認：「我上任商台行政總裁嗰陣，講過唔只一次，大家唔信，其實YT做副主席嗰陣，已經無參與商台工作好耐。」至於可曾與其他電視台接觸？Stephen笑謂：「我開電視就有接觸now。」他重申刻下在商台做得好開心，同事關係亦很好，管理層都好支持自己，繼續留任商台，跟合約全無關係。之前因官司問題，Stephen由商台行政總裁轉任首席智囊團，現時官司已告一段落，又會否考慮做回CEO？他繼續輕鬆妙答：「我唔係假做智囊㗎，係真係退落嚟，無再上去嘅打算，對於而家嘅工作範疇同崗位好開心。」

森美自認「虧」

森美聞得香港會落雪，自爆穿了兩件虧佬內衣及一條虧佬褲，他笑言：「因為我下身冇咁虧，上身虧啲。」森美還教大家正確冬天沖涼法，他說：「千萬唔好即刻淋頭，要淋咗身先，因為身體為咗保暖，啲血都會集中在腦及心臟，如果即刻用熱水沖頭，萬一身體有隱患會引發出嚟，仲可能會爆血管。」

撰文：Pauline

攝影：林良明

編輯：林梓添

設計：鄧俊明