好想試呢間航空公司

朋友同我講，佢會去卡塔爾睇世界盃。我話︰「嘩！你好叻呀去卡塔爾，但卡塔爾喺邊㗎？」朋友一呆，答道︰「喺中東嗰邊，英文係Qatar。」

一講Qatar，我就即刻知道了！一早已經好想坐佢哋嘅飛機，佢哋至今已連續第七度奪魁，同時奪得全球最佳商務艙、最佳商務艙貴賓室餐飲、中東地區最佳航空公司、最清潔機艙等桂冠。中東三雄航空公司，分別係全球最佳航空公司排名︰第1、第3同第12，真係唔錯。

我之前坐過阿聯酋，性價比高，飛機新款（嗰時係A380），價錢仲平過其他航空公司，可以喺飛機上面沖涼同埋有魚子醬食。呢間卡塔爾嘅商務艙，有坐頭等艙嘅感受。佢有3大特色︰1、座位有門；2、中間排相連的兩個座位可調整為雙人床；3、前後左右可打通為一間4人包廂。簡單講，卡塔爾航空將商務艙提升到頭等艙嘅規格。

真係好想試，但係我坐去邊呢？先唔好講呢3年個疫情癱瘓晒全世界嘅旅遊業，而家世界盃喺卡塔爾舉辦，呢個海灣國家嘅國土面積只有1.16萬平方公里，大部分地區為覆蓋沙土嘅荒漠，土地發展受限，但為咗迎接世界盃，佢哋不停趕工，要喺短時間內接待起碼120萬或更多旅客，有好多應對應該係臨急抱佛腳，會有好多瑕疵。例如我有個朋友，話機場內嘅工作人員好似無乜經驗，搞到佢哋差啲上唔到飛機，膽顫心驚。

既然係咁，我決定等完晒個世界盃先去，到時酒店應該會平啲，接待經驗又豐富啲；希望好似當年今日嘅杜拜，成為一個成熟嘅旅遊新勝地！（本欄逢周四刊登）