優雅的老來嬌

偶然看到台灣的這位婆婆，被佢嘅有型氣質吸引。深入去了解佢背後嘅故事，同樣非常吸引。

93歲嘅郝雲娟婆婆，講嘢總係輕聲細語，不時掩嘴淺笑，挺直嘅腰桿、標準嘅身材，唔單止未見老態，仲散發出歲月釀出嚟嘅優雅。

你一定以為佢以前係模特兒出身，所以一直保持住模特兒嘅特質？錯喇。喺戰亂時，佢同丈夫喺台東市區開咗間賣時裝同化粧品嘅德泰百貨行。自年輕起，娟婆婆對自己嘅衣着已經十分講究，佢總係習慣着旗袍搭配時髦墨鏡加風褸，穿梭台北、高雄等大城市批貨，當時嘅品味同眼光已經令佢經營嘅德泰百貨成為台東地區時尚指標。

自從娟婆婆老公過身，家人發現佢時時兩眼無神咁呆坐，成個人亦愈來愈沉默，兼且有時會好厭世、思想負面，檢查發現婆婆有輕微失智。

有一次，擔任攝影師的孫女連美恩喺家族聚會，發現婆婆牛頭唔搭馬嘴，飯局氣氛顯得有啲僵，於是佢突然將自己的墨鏡戴喺奶奶度，意外發現奶奶具備時尚模特兒的氣場，於是一個頑皮嘅念頭湧出，佢搵嚟造型師、化粧師朋友等人，組成「The Hidden Gem」團隊，幫娟婆婆影咗一輯相。效果都唔使我形容，大家有目共睹。連大牌子Gucci等都搵娟婆婆，認真駕勢！

我深信保持心靈年輕，會間接帶動生理年輕，這絕對係一種長壽養生嘅秘訣。

老而「嚟堅」嘅個案，唔單止發生喺娟婆婆身上，台灣仲有好幾位，中國都有帥氣伯伯70幾歲做模特兒。所以咪以為老咗唔可以前衞開放，畀人話老來嬌咪老來嬌囉！只要自己開心，又唔影響人，幾時都「嬌」得起！驕傲得起！

因此我好欣賞老正工作室，佢係香港一間銀髮模特兒中心，為銀髮一族搵番積極嘅生活！唔好認為年老就要讓位，佢哋亦需要大家給予空間。如果你有銀髮家人嘅話，我相信你都會好開心見到佢哋依然有佢哋嘅精采生活。

（本欄逢周四刊登）