細數娛樂圈「飛機王」 周嘉洛自認係慣犯

失約固然討厭，而被失約的一方都很可憐，藝人工作不定時，忽然遇上突發工作又不能推掉，惟有無奈失約。龔嘉欣曾被爽約但沒有嬲怒對方，認為別人總有原因，相當體貼；而上位小生周嘉洛則十分坦白，直認是一名「飛機王」。

周嘉洛自認衰仔，經常放朋友飛機，他坦白說︰「好多時因為遲到，遲下遲下索性唔到囉，其實開始發展到『甩底』呢樣嘢，都係緣於工作嘅，好多時收工約咗朋友，但拍嘢話唔埋通常會超時，試過有次超時大半日，最後梗係去唔到見朋友啦，好彩朋友都明白我係因為做嘢先至失約嘅。」嘉洛笑指「受害者」不止朋友，對家人失約最嚴重，認為一家人無隔夜仇，就算不守信用失約，都不會遭怪責。另外，嘉洛也曾被朋友爽約，但會體諒對方，「可能對方有事又或者唔開心呢，如果朋友懷住唔開心嘅心情應約，出到嚟都無意思啦。」

龔嘉欣險浪費朋友心思

最近大搞飲食生意的龔嘉欣，透露曾有一次幾乎失約的經歷，令她十分難忘，「放假我最鍾意留喺屋企，好懶唔想化粧同整頭，但嗰日有朋友約咗我，我諗緊化唔化粧出街好呢？仲衰到諗不如放飛機啦，內心掙扎咗好耐，最後我都有赴約嘅。」原來當日朋友為嘉欣送驚喜，「嗰晚我無化粧，頭又好亂，去到現場先知班朋友幫我搞個驚喜生日party，好彩嗰晚我無放飛機，否則浪費咗朋友嘅心機。」

另一方面，嘉欣遇過被朋友失約的經歷，「好彩仲有其他朋友嘅，所以影響唔大，其實嗰個朋友都唔係第一次放我哋飛機，不過大家無嬲佢，最重要到場嘅朋友都玩得開心。」

馬國明原諒朋友遲到兼無到

馬國明坦言每次放飛機都是迫不得已，「試過有一次約成班朋友一齊食飯，公司突然改咗rundown，所以去唔到飯局，但係佢哋一班人都繼續食飯嘅。」至於被放飛機經歷，馬明則認為不是大件事，認為朋友必然因為有要事在身；即使有朋友試過遲到一小時才通知失約，但馬明也覺得沒所謂，「其他朋友都會繼續去玩，唔係太大影響。」

採訪︰Pauline

美術：梁政敏