個唱中途蝦碌「飛咪」落台 容祖兒嚇到心臟停頓

容祖兒近日在灣仔演藝學院舉行《ANOTHER SIDE……OEY•MY SECRET•LIVE》演唱會，她昨日在社交平台分享個唱上的一條「蝦碌」片，片中的她在獻唱期間，整支咪高峰突然從手中飛跌落台，嚇得她擘大口兼一臉慌張，台下觀眾把咪拾回及遞上台。祖兒不停拍口心問︰「有無整親你？嚇死我啦。」幸好無人受傷。

祖兒留言自嘲自己一向「論論盡盡」︰「唔好睇我喺台上咁醒目，其實一直以來我有個花名叫da la di la，做甚麼都論論盡盡。斟水飲會倒瀉水，攞乜都會掉在地上，食飯嘅時候被阿媽話下巴穿窿，啲朋友話跟住我尾一定會執到寶。」祖兒指跌咪一刻個心離一離︰「當時我嘅心臟足足停止跳動咗兩秒，好彩無扑穿第一行朋友個頭……在我身上真係nothing is impossible（沒有甚麼是不可能）！」