上月宣布懷孕的張寶兒，昨日現身將軍澳宣傳新劇《破毒強人》，肚凸凸的她轉眼懷胎六個月，全程小心翼翼護胎。寶兒透露預產期在11月，預告生產前會密密吸金，努力搵奶粉錢。
新劇《破毒強人》今晚首播，演員包括陳豪（阿Mo）、胡定欣、蕭正楠（Edwin）、張曦雯（Kelly）和張寶兒等昨日齊齊宣傳新劇，並以黑白色裝束現身，寓意黑白對決。眾人分隊以氣槍射破氣球，寶兒未有參與遊戲，小心護胎。寶兒表示︰「係公司安排，佢哋好好唔使我玩危險嘢。（唔敢着高踭鞋？）保險啲，着粗踭啲，Ben（袁偉豪）成日叮囑我要小心。」寶兒指懷孕期間身體沒有不適，精神不錯，故經常出外，「我啲朋友話依家多啲出去，遲啲就唔可以喇！」寶兒又透露最近剛與老公去北京和河北遊玩，九月有機會飛新加坡工作。至於預產期，她說︰「預產期11月，醫生話我到10月都仲飛得，所以喺香港有工作都會繼續做。（全力賺奶粉錢？）係，養B唔容易，生B都咁貴啦！（等老公養？）佢要努力，我又要努力。」
陳豪登台重拾歌手身份
另外，陳豪在劇中飾演毒梟，但他不擔心三名子女會看到，因為他們很少看電視。提到最近到佛山登台大開金口，阿Mo說︰「耐唔耐都有登台，係疫情期間少咗。（唱兩首歌袋16萬？）我唔係好清楚價錢，登台嗰時我做番歌手身份，（想再出歌？）算啦，我呢啲有限公司，唱人哋啲歌好啲。」至於蕭正楠與張曦雯在劇中有感情綫，Edwin自爆為投入角色，拍攝時刻意跟Kelly保持距離，深怕被誤會無禮貌；Kelly即說︰「我同佢未合作過，拍攝初期覺得佢好cool，依家終於明白。（以為前輩好大牌？）當時我講英文以為佢聽唔明，唔緊要啦，當佢係一個聆聽者。」
採訪、攝影︰Steven
美術︰梁政敏
▲胡定欣露腰騷結實腹肌，成為全場焦點。