膠樽一毫子回收

記得好細個時，買汽水要按樽，退回玻璃樽就可以攞番一毫子。後來在通脹之下，按樽錢慢慢加到一蚊，因為一毫子根本無人會理！

不過，估唔到今時今日竟有人覺得一毫子回收一個樽，這價錢合理。塑膠回收商「塑新生」4月宣布停運，點解會搞成咁？「塑新生」的理由是︰「現時香港膠樽回收率偏低，目前工廠處理量只有總處理量的30%。」簡單來說，就是香港人沒有回收膠樽的習慣，工廠根本沒有那麼多膠樽需要處理。

相信很多人都不知道，香港有回收膠樽的入樽機。120部由環保署設置的入樽機可以讓市民回收膠樽，每入一個就回贈一毫子。你沒有聽錯，是一毫子！而且入樽機分布不均，沙田區有12部，灣仔區卻只得3部，難怪得咁少人回收。

綠色和平做的調查就指出，如果把回收的價錢提高至一蚊，預料回收率可提高至7成以上。綠惜地球就話，應該以「按樽制」取代「回贈制」。這些其實都是常識。超市購物膠袋都要收一蚊膠袋徵收費，點解回收膠樽就只得一毫子？按樽制在汽水、牛奶等飲品行之有效，點解不繼續用有效的方法回收膠樽？

（本欄逢周一刊登）