怪聞一則

話說每天早上，同事阿美在中環落巴士，途經恒生銀行總行，路上就可以幫公司拎到各份本地免費報章，唯獨其中一份攞的時候很特別，引起疑惑（當然不是各位讀者睇緊這份啦，哈哈）！

一般派報章的人都會一手捧着一疊報紙，一手將最頂那份拿起，遞出去讓經過的途人攞，但阿美遇到的是一位另類派報人，他不但不會主動將報紙遞給途人，就算有人走近向他伸手攞，他都會攬實疊報紙唔畀，所以經常同人鬧交，阿美都怕咗佢！

咁去邊度拎好呢？阿美改為再行前一點，在中環街市對面攞，誰知又有怪事出現！

在這裏遇到的女士，將整疊免費報紙收埋喺箱底（保險箱乎？），要人問佢先至畀！阿美頭幾次經過都以為已經派完，直至一次碰巧見到有人停低問，女士才在箱底「潛」一份報紙出來，才終於知道「遊戲玩法」！

阿美疑惑，難道這兩位奇人都當免費報紙是自己的資產？大家午飯時七嘴八舌去分析。老闆話︰「有佢哋嘅道理，因為派唔晒，佢哋就可能會拎出去賣，一大疊免費報紙都有一定重量，隨時都真係『有價有市』㗎！」

不知道會否給老闆估中呢？

（本欄逢周一刊登）