歌詞「資質不夠少說話」警惕自己 吳保錡靠跑步改變人生

ERROR成員吳保錡近年愛上跑步，更因跑步而悟出人生道理，最近推出個人單曲《Echo My Heart》，都以跑步來比喻人生；新歌最想帶出訊息，是縱使人生總會遇上許多困難，但只要堅持、努力、不要放棄，最終都能跨過困難。保錡更以當中一句歌詞「資質不夠少說話」，不停警惕自己。

2021年，吳保錡爆出三角戀，也曾經因為失言而導致負評如潮，外界一沉百踩，網民更留言勸他退出ERROR。他在真人騷《ERROR自肥企画》以「反省中」格仔遮樣出鏡，真誠的表現拯救了他，觀眾開始對他改觀了。

跑步更徹底改變了保錡的人生，無論生活習慣或想法都像重生一樣，最重要是學會了專注。保錡說︰「好多嘢都係日積月累，所有嘢都係努力儲番嚟。」他指現時只想專注在工作上，「我想接多啲騷唱歌，不論啲觀眾鍾唔鍾意我，起碼可以share我啲音樂。不過我唔係想開個人騷，我唔係無自信，係人貴自知；我想唱多啲騷，係想吸納唔同嘅人，而唔係每首歌放上網絡，fans聽完之後覺得我勁，呢件唔係好事。我都無唱live，大家點知我唱得好唔好啫？我錄歌之嘛，我錄咗300幾個take，雕琢到好聽之嘛！」如要為自己打一個分數，保錡只給自己三分，但會用後天努力把分數搶回來。

評自己歌藝得三分

32歲的他很早就出來社會工作，「成日睇訪問，有啲藝人話自己做呢行無錢，戶口得番個位數，我就一定㗎喇！我好細個出嚟社會做嘢，好多人都睇我唔起，入行做茄哩啡捱緊，啲人話我唔掂，咁樣衰都做明星。其實我唔需要理人哋點講，想做就去做，同跑步一樣，想去跑就落樓下跑，條路永遠都係自己控制，而你就決定行定唔行。」

除了做茄哩啡之外，保錡還做過侍應、地盤工人、貼街招、跟車等工作，保錡苦笑說︰「做每份工都被人鬧，做服務行業，本質就係被人鬧，人工包咗。依家心力之所以咁強大，多少因為我做過唔同嘅基層工作，經歷較多。」現在的保錡，找到人生目標，「我鍾意唱歌，喺娛樂圈我有得出歌，好開心有作品留喺呢個世界。」保錡以半紅不黑形容現時的演藝成績，所以會不停追求進步，令大家認同。

化粧︰Cori Wong by Annie G. Chan Makeup Centre

髮型︰Harris Lai by CHIC PRIVATE i SALON

服裝︰Feng Chen Wang, Giuseppe Zanotti

場地︰Pier 1929

撰文︰黃曉妍

攝影︰馮凱宜

美術︰梁政敏