去旅行感受新世界

由上年秋天通咗關後，我身邊朋友個個報復式咁飛呀飛，已經飛咗好多轉。但我好堅定，無畀佢哋引誘到我。因為我呢個無膽又無用嘅井底老娃，萬一有突發事發生，我必定會「嚇死異鄉」。所以等到今時今日，先終於有信心，踏出我嘅第一步，走出香港去旅行！Yeah！

我雖然係一個好鍾意去旅行嘅人，但如果要付出隔離嘅代價，就唔好預我喇。

呢個疫情，我哋嘅活動好似進入靜止狀態，其實個世界係無靜止過，科技每日不停咁進步。3年無踏足機場，論論盡盡，突然唔記得應該出示身份證定Passport去過閘出境，點知原來有人面識別，大門即開！真係讀萬卷書不如行萬里路，自己親自去感受下新世界。

以前出門，最緊要帶機票、外幣、旅行證件等等，而家呢個世代，唔可以無咗電話。之前去韓國餐廳，見到個餐牌，無相片嘅話，真係估唔到嗰啲會係乜嘢食物；佢哋大多又未必講到英文，雞同鴨講，惟有賭一鋪，喺個餐牌度亂指，希望有運，指到啲好食嘅嘢。今時今日嘅人工智能已經好順暢，喺個餐牌度由頭掃到尾，已經繙譯晒你所要嘅語言，仲可以用人工智能做中間溝通橋樑，雞可以同鴨講，誇啦啦，頂呱呱！

想去邊？買啲乜？從社交媒體睇人哋打卡介紹，就已經可以跟住佢哋嘅指引去玩、買、食！呢種為所欲為、無乜計劃嘅旅行方式，好啱我！

隨住踏入更加出神入化嘅人工智能科技時代，真係更加要與時並進，不能脫節！

（本欄逢周四刊登）