姜皓文想孖ERROR拍綜藝 保錡厚面皮向宣萱求包養

由姜皓文（黑仔）、ERROR成員梁業（肥仔）和吳保錡參演的ViuTV劇集《極度俏郎君》下周播映，提到女神宣萱及張慧儀有份演出，保錡大賣口乖狂讚二人靚女，更直接開口要求宣萱包養他，相當大膽。

ERROR今次與前輩姜皓文、宣萱及張慧儀合作拍劇，吳保錡尤其開心，除了公開表示仰慕張慧儀外，原來他亦對宣萱「心心眼」。保錡說︰「細個睇開嘅人，依家出現咗喺自己面前。見到宣萱就會諗起《尋秦記》，我竟然可以同佢拍戲？佢真係仲係咁靚，黐綫！跟住見到佢狂食嘢，都可以咁瘦，真係好奇妙。我係咁話佢靚，問佢『可唔可以養我』，我話『講真你咁靚，又有啲錢，你可以養我呀』！」

黑仔讚四子可交心

問到宣萱怎樣回答？保錡笑說︰「咁梗係唔OK啦！如果OK咗，我仲使坐喺度做訪問？去咗做宣萱助手啦。」他表示遭宣萱斷言拒絕︰「大佬呀，成熟嘅人都係一嘢拒絕啦，唔好有遐想吖嘛。」肥仔聞言踢爆︰「無直接拒絕，係直頭唔答你喎。」黑仔再「狙擊」︰「其實係直頭行咗去！」

首度拍攝ViuTV劇集的黑仔，飾演一名坐了20年冤獄的蠱惑仔，出獄後想重回正途。對於第一次跟ERROR合作，黑仔坦言拍攝時太開心，簡直不想收工，「最初以為佢哋（ERROR）係小朋友，相處耐咗，發覺得佢哋可以分擔開心同唔開心，係可以交心。」保錡則大讚黑仔︰「黑仔哥哥拍咗好多戲，我又鍾意睇港產片，所以見到佢覺得好奇妙，竟然可以同佢一齊做戲？」

至於ERROR拍劇時經常爆肚，黑仔笑說︰「佢哋係連住一齊NG，真係好error。」原來未跟ERROR合作前，黑仔已經看過旅遊節目《花姐ERROR遊》，他坦言很想跟四子拍攝綜藝節目，「我撩過幾次，之前我喺檳城，肥仔同阿Dee（何啟華）喺吉隆坡，但時間夾唔啱。」

【一按睇片】

攝影︰何家賢

撰文︰黃曉妍