兔年新大計 溫碧霞拍彭浩翔新片扮美人魚

溫碧霞（Irene）趁兔年快來臨，日前專程到本地農莊探望可愛兔仔，喜迎兔年。Irene去年主力在內地工作，早前回港跟家人團聚，過年後便飛到日本旅行；之後Irene馬上啟動工作模式，今年首個重要任務，便是拍攝由彭浩翔監製的新片，她在戲中飾演美人魚，令她相當期待。

喜歡小動物的溫碧霞，日前專程到大埔一個農莊探望可愛兔仔，Irene除了餵兔仔吃飼料，還將一隻小白兔抱在手心，充滿愛心的她邊撫摸兔仔邊溫柔地說︰「兔仔軟淋淋，好舒服呀，好可愛！」小時候曾飼養兔仔的她說︰「我媽咪好有愛心，細個住調景嶺，佢養咗好多小動物，有狗、貓、兔仔、雀仔同烏龜，令我都好鍾意小動物。但我細個養嘅兔仔好快就走咗，好傷心，唔想再養，同埋兔仔其實好難養。」

不用隔離感興奮

過去幾年一直忙於工作的Irene，甚少時間留在香港陪伴家人，所以農曆年會留港與家人度歲，接着與老公飛日本過二人世界，「我哋會去東京、富士山浸溫泉，囝囝（何國倫）因為喺美國讀書去唔到。佢喺當地讀書好開心，老師喺假期會帶佢哋去露營、學滑雪，功課又唔多，擴闊咗佢嘅眼界，而且佢又好識𠱁人，好多老師、同學都好錫佢。」

談到兔年大計，Irene透露稍後跟彭浩翔合作，拍攝由對方監製的美人魚電影。電影暫定到台灣拍攝，她指今次演出跟過往很不一樣，「我好鍾意個劇本，之前演嘅都係正劇，今次角色有少少黑色幽默，加上親情、愛情元素，睇完令人會心微笑。」飾演美人魚的她將有幾場水中戲份，雖然她不懂游泳，但自信可以應付。

如今各地疫情緩和，過往因工作經常中港兩邊走的Irene，笑言終於不用隔離，令她鬆一口氣，「我隔離過五次，最長試過隔離21日，我最鍾意自由，困住自己真係最辛苦，不過好彩喺隔離日子我都學識獨立，會睇下書、做運動、聽歌、睇劇本，時間好快過，但我都唔想再隔離，哈哈！」

場地︰蝶豆花園有機農莊

採訪︰倪小珊

攝影︰Alma

美術︰梁政敏