貨倉收藏玩具 江𤒹生獲封「ViuTV古天樂」

日本動漫電影《THE FIRST SLAM DUNK》快將上映，再次掀起熱潮，男團MIRROR成員江𤒹生（AK）、呂爵安（Edan）、邱士縉（Stanley）和ERROR成員郭嘉駿（193）前晚出席首映禮。四人大談昔日沉迷漫畫的趣事，AK最為瘋狂，有一個私人玩具倉，收藏數百件動漫玩具，獲封為「ViuTV古天樂」。

江𤒹生、呂爵安、邱士縉和郭嘉駿都是漫畫《男兒當入樽》忠粉，前晚四人出席首映時大表興奮。AK自爆讀書時打籃球是為追女仔︰「我本來踢開波嘅，但為咗討好心儀嘅女仔，所以打籃球，我讀書唔叻，咪用運動去吸引人囉。」

呂爵安忘記自己生日

AK直認對《男兒當入樽》的熱愛程度爆燈，「兩年前我有機會收藏咗男主角櫻木花道嘅1︰1模型。」他自爆租用貨倉擺放多年來收藏的玩具，即被193取笑他為「ViuTV古天樂」。

另外，前晚「爵屎（Edan粉絲）舉起印有「呂腫生辰快樂」字樣的橫額，原來正是Edan農曆生日。Edan笑言︰「唔係佢哋提醒，我都唔記得自己生日。」AK即表示送上漫畫女主角赤木晴子的巨型模型予壽星仔，Edan笑謂︰「我無貨倉喎，擺喺屋企又好變態。」此外，MIRROR今日為Alan Walker演唱會擔任嘉賓，但姜濤因身體抱恙缺席。

採訪︰Pauline

美術：梁政敏