自爆演出前例必怯場 陳柏宇︰我唔係天生表演者

出道16年的陳柏宇（Jason）向來歌藝了得，更曾參與大大小小超過30場音樂會演出；但原來他至今每次上台前，仍然感到怯場，更試過太緊張而忘記拉褲鏈。Jason坦言並非天生擅長表演，所以未能做到輕鬆自在，但強調這樣對演出未必是壞事。

陳柏宇繼早前的四台冠軍歌《有我》後，近日再推出新歌《墜落》，並邀得本地獨立rapper Novel Fergus合作，歌曲結合rock與hip hop元素，鼓勵樂迷放膽迎接世界和生活的突變。新歌MV為配合歌詞，選用暗黑的拍攝手法，Jason以第三身描述故事，更特別找來四名特技人，分別飾演學生、上班族及一般青年男女，眾人在大廈與大廈之間的天台來回穿梭，場面刺激又驚險。

第五波疫情稍為放緩，Jason亦回復設有現場觀眾的演出。不少歌手期待跟觀眾見面互動，但他卻是例外，反而享受網上直播唱歌。Jason解釋︰「做直播少啲壓力，其實我喺台上表演長期有壓力，因為我唔係一個天生嘅表演者，表演嗰陣始終唔能夠做到好自在，咁樣對我演唱一定有影響，但呢個影響未必係壞事，有時好緊張咁唱，又會再謹慎一啲。」

雖然有十多年舞台經驗，但Jason竟自爆每次上台前，必定心跳加速，而且面對愈大的舞台就愈大壓力。他直言︰「喺紅館開演唱會對住過萬觀眾，我非常緊張，要唱四、五首歌之後先開始定落嚟；但平時大部分演出都唔會有咁多首歌畀我熱身，所以長期處於緊張狀態，仲經常因為太過緊張而唔記得拉褲鏈。」

想唱迪士尼英文兒歌

提到Jason女兒陳羿辰（Abigail）現已三歲多，甚有表演慾，問他可有計劃為囡囡推出兒歌？Jason直言暫時無此打算，「我平時已經成日同佢唱兒歌，不過唱兒歌都唔錯，可以賺好多錢，但一定要係英文歌。如果唱到一首迪士尼主題曲就夠喇，即刻發達！」

化粧︰Frances Ho/jessica chan team

髮型︰The Attic@AlexSo & Aki

服裝︰FOOTLOOSE TYCOON, Ohio, Levi's

撰文︰倪小珊

美術︰梁政敏

攝影︰林良明