准許下一代入行 吳君如爆女兒做《闔家辣》1秒臨記

吳君如最近落力宣傳主演兼監製的賀歲電影《闔家辣》，在戲中與鄭中基（Ronald）、梁詠琪（Gigi）及呂爵安（Edan）大放笑彈的君如，原來秘密安排15歲愛女陳是知到片場做臨記。她表示不會阻撓女兒入行︰「耳濡目染，無得唔畀。」

君如找來Ronald及Gigi在戲中飾演夫妻，育有兒子呂爵安，君如大談這個新鮮組合：「我同鄭中基合作無間，佢認真又好戲；而Gigi本身有家庭同小朋友，好啱媽媽角色，又有自然美。」Gigi指君如主動約她見面睇劇本，「因為角色有個20幾歲嘅仔（Edan），君如擔心我過唔到呢個關口，所以親自搵我，等我無得推！其實計下數，我真係生得出Edan。」Gigi有個「廢老公」Ronald，二人經常吵架，「戲入面我講嘢好mean，句句窒住老公。」但Gigi現實中跟西班牙籍老公十分恩愛，她強調夫妻不會如電影般相處︰「因為我老公唔識講廣東話。」

傳授「武功」給呂爵安

提到「兒子」Edan，Gigi指Edan在遠處看到她便叫「媽咪」︰「真係好冧，我諗全香港好多粉絲都想被佢叫『媽咪』，佢好真誠又謙虛。」君如則大讚Edan喊戲演得好：「我循循善誘，佢又演到，肯定勁過MIRROR另外11個，因為《全民造星》最難喊嘅人就係佢。（Edan盡得你哋真傳？）係呀，過晒啲武功畀佢。」

提到女兒陳是知，君如指囡囡甚有表演慾：「個女好想演戲，又好鍾意唱歌跳舞，佢有幫《闔家辣》做咗一秒鏡頭，演接待員。（佢自薦？）梗係，佢本來無對白，但佢自創，一路傾電話一路扮，我畀咗100蚊利是佢，港產片資金有限。（畀囡囡入行？）一定畀，半工讀都得。家庭耳濡目染嘛，亦無得唔畀，佢真心去做就知艱苦。」

吳君如

造型︰Ricky Kwok

首飾︰Tiffany & Co.

鄭中基

服裝︰KOWLOON CITY BOY, VO-YAGE

鞋履︰Zegna

梁詠琪

髮型︰Nick Lam @Orient4

化粧︰CircleCheung@NDn.Co

場地︰香港瑰麗酒店Rosewood Hong Kong

撰文︰倪小珊

美術︰梁政敏

攝影︰林良明