帶愛貓「白雪雪」上鏡 鍾雨璇︰佢識發放正能量

鍾雨璇去年底於《新城勁爆頒獎禮2021》台上暈倒，幸好休息過後身體已無大礙。日前，鍾雨璇帶同愛貓「白雪雪」為某寵物美容中心拍攝宣傳片及賀年訪問，雖然白雪雪在拍攝期間有點鬧情緒，但也為團隊帶來歡樂氣氛，最終順利完成拍攝。鍾雨璇說︰「上次同白雪雪拍新歌《蛻變》MV時，佢好配合，唔會好似其他貓匿埋喺啲隱蔽嘅地方，又好似識聽人指示咁。」

鍾雨璇開心表示，愛貓令家中充滿生氣︰「以前未養白雪雪，屋企人一返到屋企就各自入房，但自從有咗白雪雪，大家都鍾意喺客廳同佢玩。有時工作唔如意，返到屋企見到佢，即刻成個人開心晒，唔會再諗負面嘢，佢就好似一部識發放正能量嘅機器。」