回憶MIRROR難忘事 盧瀚霆︰12個攬住一齊喊

人氣男團MIRROR風頭一時無兩，12子今年拍攝真人騷後，感情和默契更見深厚。不知成軍三年，成員間又有甚麼難忘回憶？往後又想有甚麼新嘗試呢？

對Anson Lo而言，12子成軍三年來，真正互相認識的日子就是拍攝《調教你MIRROR》，「我哋12個攬住一齊喊，呢個情景真係最難忘，成件事好同步、好齊心。呢個節目可以講係徹底改變我哋呢三年嘅相處方式，以往彼此嘅誤會都化解咗，一切重新開始。」

Anson Lo和呂爵安（Edan）這對「大叔CP」非常熟稔，但Anson Lo原來更想與Lokman和Tiger去旅行，他解釋︰「工作上比較少同佢兩個合作，我諗佢哋都鍾意去陽光與海灘嘅地方，所以我最想去馬爾代夫！」

楊樂文（Lokman）難忘去台灣狂食肥牛

MIRROR成軍一周年時，推出歌曲《Reflection》，更特意飛到台灣拍攝MV。提到台灣之行，Lokman印象特別深刻︰「嗰次去台灣拍MV，最難忘就係收工之後大家一齊打邊爐，原來大家都好食得！尤其大家都好鍾意食肥牛，每次都係一盤、一盤咁倒落個鍋…嗰次大家真係玩得好開心，因為難得12個隊員聚埋一齊，仲要去外地大吃大喝。」

身為隊長的Lokman，原來最希望與團中最年輕的Tiger合作拍戲，「無論電影定劇集，我都好想同佢喺熒幕入面做兄弟，我覺得會幾好玩。（想拍咩類型嘅戲？）咩都得呀！拍打戲嘅話，就可以對打，又或者我哋去打人都得。」

柳應廷（Jer）期待同Lokman組「港普CP」

對Jer來說，最難忘是MIRROR成軍後於九展舉行的第一個演唱會《2018 The First MIRROR Live Concert》，他說︰「以前仲係以觀眾心態去睇騷，估唔到有一日會調轉身份，自己企喺台上表演畀觀眾睇，當時咩都唔識，但所有聚焦、燈光都集中喺自己身上，感覺好神奇。」

熱愛音樂的Jer，直言最希望與隊中的饒舌能手Lokman及王智德（Alton）合作︰「Lokman好有型，佢喺《虎道門》嘅表演好好睇！真係好想有機會同佢合作，一齊喺live show玩下。我都好期待可以同佢合組『港普CP』，哈哈！」

江𤒹生（AK）約定Ian去公路旅行

副隊長AK最難忘的事同樣是《調教你MIRROR》，因為MIRROR成軍以來，外界一直認為他們不夠團結，所以AK十分珍惜一起入camp相處的時光，「最難忘係我哋12個坐埋一齊食飯，雖然睇落好平常嘅事，但以往走埋一齊都未必可以同枱食飯，所以好有感覺。」

AK與隊員陳卓賢（Ian）素來感情友好，AK也一直希望能與Ian到美國及加拿大享受公路旅行，「其實我同Ian由參賽嗰時已經有呢個約定，呢個係我哋之間嘅to-do list。我都想同12位成員一齊去旅行，希望疫情快啲過，可以快啲實現夢想。」

邱傲然（Tiger）最想全員出埠拍攝

《調教你MIRROR》給予12子長時間相處、溝通及解開心結的機會，Tiger同樣印象深刻，並說︰「嗰次算係一個轉捩點，大家意識到團結就是力量。做完呢個節目之後再去做演唱會，大家就會睇到我哋唔同咗。（想唔想12個每年都拍一次真人騷？）呢樣嘢都係其次，但如果可以出埠拍就當然會更加團結，去得愈遠就愈好，例如希臘、北極，反正都係公司畀錢，哈哈！」

談到未來發展，Tiger坦言希望多接觸戲劇︰「拍電影又好，拍劇又好，總之可以參與下都好開心。而我就好想同Lokman一齊拍戲，咩戲種都可以。」

採訪︰Pauline

美術︰梁政敏