疑因港姐決賽編排混亂黑面 曾志偉：做得唔好要檢討

《2021香港小姐競選》前晚圓滿落幕，對於頒發「最上鏡小姐」時發生小插曲，無綫副總經理曾志偉被發現疑似黑面，他昨日出席活動時否認黑面，但承認在節目安排上可做得更好，並會盡快檢討做得不好的地方。

曾志偉昨日與一眾出爐港姐出席活動，談到前晚決賽在頒發「最上鏡小姐」時甩轆，原本應由上屆最上鏡小姐謝嘉怡與12位佳麗出場，但一眾佳麗遲遲未有現身，司儀們惟有拖延時間，並改為先宣布五強名單；期間志偉被發現疑似黑面，並訓斥五位司儀。志偉昨日否認黑面，並笑謂：「係咪現場打燈打得唔夠光，所以黑咗少少咋？」他續指自己十分緊張節目：「完咗show當然要即晚檢討，任何節目做得唔好嘅地方都要盡快去檢討。」志偉又解釋編排混亂的原因︰「因為有四位落選佳麗着錯衫，其實（司儀）喺台上直接宣讀賽果就得啦。」

至於司儀之一的陳凱琳（Grace）表現被批，不但一度「食螺絲」，更不時面向鏡頭翹手，動作似乎有欠得體。昨日志偉亦為Grace幫口道︰「可能台上有Do姐（鄭裕玲），佢唔知自己應唔應該喺嗰個時候講嘢，其實佢幫到忙就得。」

宋宛穎獲媽媽任軍師

另外，出爐港姐冠軍宋宛穎（Sabina）昨日凌晨返回寓所慶祝，無綫娛樂新聞台派主播追訪，Sabina的婆婆事先準備好孫女最愛的炒飯，並大讚孫女︰「佢由細到大都好乖、好聽話。」婆婆又大爆身在澳門的宋媽媽是Sabina的軍師︰「佢媽咪最緊張，喺澳門同40幾人一齊慶祝，嗌到不得了！」Sabina則表示︰「媽咪話我表現好好，為我感到驕傲，比賽前我每一餐都要向媽咪滙報，通過先可以食。」

採訪︰Pauline

撰文︰倪小珊

攝影（部分）︰林良明

美術︰梁政敏