女神吸引力 吳卓羲戲內戲外望實劉心悠

劉心悠與吳卓羲（Ron）主演的電影《女人街，再見了》將於明日公映，女神心悠於戲中化身「港版羅拉」做搬運工人，兼且要「喪鬧人」。不過心悠就直言是次演繹未夠放，皆因她不夠時間將白滑皮膚曬黑，又無需爆粗，她直言︰「我未試過拍戲鬧人鬧得咁勁，希望下次可以紋身或食煙。」心悠一心改變乖乖女形象，認真大膽！

電影以旺角女人街作故事背景，帶出沒有血緣關係的小販（廖啟智飾）與非法居留兒童（梁珈榕飾）的感人父子情。戲中吳卓羲化身古惑仔，衝擊觀眾心目中的幹探形象，他笑言︰「其實我以前拍劇都演過宅男，不過觀眾見我拍戲演警察多，加上喺旺角鬧市拍攝，所以好難忘。」Ron暗示其角色是警察加古惑仔，但未知是否卧底，他在戲中又充當護花使者保護心悠︰「我同心悠有好多一齊跑嘅戲份，街坊以為我係工作人員，變咗佢嘅貼身保鑣。」

無緣食煙慨嘆失望

至於心悠則初嘗做基層搬運工人的滋味，原來她參考了早年紅遍網絡的「港版羅拉」朱芊佩，「我要扮揸貨車同操作唧車，我有睇過港版羅拉嘅報道，但決定接拍呢套戲到開工只得兩個星期，遺憾唔夠時間操大隻同曬黑啲！」難得女神「落入凡間」，心悠亦要迎合角色喪鬧Ron，她表示︰「我第一次咁惡，因為戲中Ron阻住我搵食，我以前都未試過鬧人鬧得咁勁，不過唔使爆粗！」

心悠直言希望下次演類似角色時，可以扮食煙貼近角色性格，「講粗口就驚自己講得唔夠地道，變得太搞笑，反而想試下食煙或者紋身，但今次導演話無呢個需要，我都有啲失望！」話雖如此，心悠依然非常投入，開工不久已拉傷大腿，她更因影響拍攝進度而感到內疚︰「當時要喺鬧市拍攝奔跑場面，由於我無着運動鞋又無拉筋，試戲嗰時已經拉傷腳，之後都要頂硬上。」

觀摩智叔獲益良多

心悠與Ron是不少觀眾心目中的女神及男神，二人初次合作卻未有過電，但Ron笑言心悠是公認的靚女，戲裏戲外均望實對方，「佢本身性格好吸引，揸貨車都好好睇，導演叫我望鏡頭，我話唔得，心悠太吸引喇！」不過戲中二人沒有感情綫及親熱鏡頭，認真可惜。

此外，提到該片是老戲骨廖啟智的遺作，Ron坦言在對方身上「學到嘢」，他說︰「智叔好了解角色、好犀利，好快就知點樣演得出色，點樣吸睛但又唔會搶戲，係一個好專業嘅演員！」心悠則表示︰「平時智叔講嘢好溫柔，但有場戲佢真係鬧到囝囝梁珈榕喊，仲要當街打佢，睇劇本其實唔使咁盡，令我哋好驚喜。」

撰文︰Steven

攝影（部分）︰林良明

美術︰梁政敏