爭新人獎唔怕比較 ANSONBEAN獲欣宜送蕉打氣

陳毅燊（ANSONBEAN）在《全民造星III》勇奪季軍後，人氣急升，他早前正式加盟寰亞唱片，並於前晚舉行新歌發布會及MV首播。對於今年將與呂爵安（Edan）、張天賦（MC）等競逐新人獎，ANSONBEAN坦言不怕有比較，最重要是做好音樂。

ANSONBEAN前晚出席頭炮新作《CRUSH（oh no！）》的發布會及MV首播，獲同門鄭欣宜及「折骨Ben」趙祥誠到場支持。適逢新歌推出當晚，「香港劍神」張家朗亦於奧運奪金，他笑說︰「今日（前日）真係好日子！」

歌影視三綫發展

ANSONBEAN在活動上連跳兩支勁歌熱舞，全場拍手起哄，期間ANSONBEAN不忘騷肩膊，卻被指近日頻頻操肌而收收埋埋，他笑謂︰「我希望大家專注喺音樂上，其實我都唔算『孤寒』，如果跳舞時無啦啦除衫會太搞笑。（留番開個唱先騷肌？）都可以呀！嚟緊唔一定出快歌，慢歌都一樣鍾意，未來亦會拍電影同劇集三綫發展。」

提到今年將與Edan@MIRROR、肥仔@ERROR及MC等競逐新人獎，競爭相當激烈，ANSONBEAN指很榮幸自己能成為今年新人的一分子，但不會視其他人為對手，最重要是做出大家欣賞和喜歡的作品，可擔心外間比較？他說︰「唔怕！（好有信心？）其實無諗過有比較。」

而發布會開始前，師姐欣宜捧住一籃香蕉突擊ANSONBEAN的化粧間，並說︰「恭喜你，上次你送咗一梳蕉畀我，我今次曬你冷，送你四梳蕉，『蕉』氣勃勃！」ANSONBEAN非常驚喜︰「真係勁好多，成籃送嚟！」欣宜續說︰「呢啲熟啲㗎，上次你送嗰啲綠色，依家成熟咗，加油！」

採訪︰Pauline

美術︰梁政敏