合唱《信者得愛》破例狂舞 鄭秀文成功打開黎明的腿

黎明（Leon）前晚請來鄭秀文（Sammi）擔任第二場個唱嘉賓，Leon除了自爆用「風呂減肥法」外，還與Sammi合唱一曲《信者得愛》，一向斯文的黎明被Sammi感染得扭身扭勢，超驚喜的Sammi事後在社交網笑指自己成功打開了黎明的腿，認真搞笑。

前晚演唱會吸引黎明契爺胡楓（修哥）、霍啟剛與太太郭晶晶、導演袁劍偉與太太林嘉欣、蔡一傑及童愛玲等捧場。Sammi以一身型爆的全黑打扮擔任嘉賓，二人合唱《信者得愛》時，黎明戴着黑超伴舞又rap歌，令Sammi驚喜莫名，大叫︰「Leon跳舞呀！」台下粉絲見到偶像跳舞亦尖叫不絕。

事後Sammi上載兩人合唱的片段到社交網並留言︰「Mi的『信者得愛』成功打開了Leon的……腿和腳，黎生跳舞！好狂野。城城見到應該會雙腿發軟怯一怯。（I'm just kidding la！！城城是the best舞王）Mi在台上忍唔住狂笑，Leon跳舞Mi唱歌，哈哈！今晚好好玩。」她又鬼馬表示︰「信者得愛的魔力，Mi的演唱會癮出來了，看來我要快快想concert的事，瘋狂Mi遇上斯文黎，黎樹根朱金梅合體，黎生比Mi搞到㷫烚烚瘋狂起舞，支持好可愛的黎生。」蔡卓妍亦留言︰「未見過Leon咁high！」

自創風呂減肥法

Sammi經常在社交網分享運動後爆汗的短片，原來黎天王亦有捧場，他說︰「Sammi，你做運動keep fit好勤力，我見你流好多汗。咁你知唔知我點keep fit？我係用日本風呂式。首先開個bath然後浸落去，諗住自己喺日本，聽風呂音樂浸20分鐘，起身着返件浴袍，房入面開28度冷氣，食碗辣麵，坐15分鐘，成身流晒汗，肯定無咗三至四磅。」Sammi邊聽邊鬼馬笑說︰「又浴缸又除衫，好有畫面……見到你啲肥肉呀！依家無，依家好fit！」黎明即金句王上身說︰「肥肉會慢慢變少，水份嚟啫！」

講到興起Sammi又爆料，指不知何時黎明變得個人好飄、好迷離，她稱幾年前黎明主動致電自己表示會替她監製一首歌，又表示會拍埋MV，但突然有一天，黎明又表示沒空做，她笑言︰「乜你咁飄㗎？你啲節奏好難跟呀！」黎明自嘲︰「我知我成日講嘢斷片，生活都係咁。（啲人話生咗仔會無記性。）又唔係我去生。（生女可能會好啲。）可能係，哈哈！」

撰文︰倪小珊

美術︰梁政敏