識廣東話真係好

「食住花生等睇戲。」

「慳番啖氣暖肚。」

「呢單嘢唔係我跟開。」

以上呢幾句，都係香港人常用嘅廣東話。不過，大家又知唔知道，原來廣東話都會出現喺名人嘅墨寶裏面？在飲食界鼎鼎大名的蔡瀾先生，極愛寫書法，如果去九龍城食飯，就有機會在餐館看到蔡瀾的題字。

除了傳統書法，蔡瀾也反傳統以廣東話寫書法，甚至潮語也寫過，例如「機會嚟喇飛雲」，十分貼地。

據聞蔡瀾先生的廣東話書法作品最近拍賣，就以估價近7倍的價錢賣出。

不過，又唔係人人都欣賞廣東話，認識有家長從小逼細路在家講英文，又讀國際學校，於是呢位喺香港長大嘅小朋友，佢嘅廣東話一直都講得唔好，連落街買嘢都有困難。

倒是在外國見過努力學廣東話的人。有次去日本旅行，在café歎咖啡時，聽到廣東話，起初以為是香港同胞，後來發現是一位日本人正在跟面前的老師學廣東話，學生在嘈吵的咖啡店仍然非常專心呢。

另一次去睇演唱會多了張門票，突然有人問可不可以讓。原來他是越南人，上一代懂廣東話，所以佢識聽識講，聽到我哋有多張飛，就即刻搭訕，呢位朋友攞住張飛話︰「識廣東話真係好咯。」

（本欄逢周一刊登）