疑被舊愛爆出軌 呂爵安直認唔開心

男團MIRROR人氣愈來愈旺，不過人紅是非多，成員呂爵安（Edan）近日疑被舊愛踢爆出軌，網上更流傳疑似他撩女仔開房的對話截圖。Edan昨日與隊友盧瀚霆（Anson Lo）及陳卓賢（Ian）現身，Edan坦言為是非不開心，又表示已跟舊愛溝通，不想事件再影響對方。

Edan、Anson Lo及Ian昨日出席《Never Give Up》網上慈善演唱會發布會，早前捲入出軌及撩女風波的Edan，大方回應是非，坦言因事件而不開心：「但過咗幾日就無事，我明白藝人要面對公眾，亦都有（跟前度）溝通過，唔想事件影響到佢。」對於被揭舊史，Edan表示已調整自我，問他會否擔心影響形象？他直言︰「擔心都無用，最重要做好自己，好彩有兄弟支持。（日後網上留言更謹慎？）唔回應嘞，多謝大家關心。」Anson Lo立即幫口，希望外界關注他們在幕前的努力和成果。

另外，有指Anson Lo的粉絲投訴歌迷會帳目不清，質疑有人玩弄權力及中飽私囊，Anson Lo指經理人花姐（黃慧君）曾跟他討論事件：「粉絲之間有唔同意見，每個人喺對錯嘅睇法唔同，希望佢哋一團和氣。（出面調停？）我喺社交平台講過唔鍾意睇到有人鬧交，希望理性解決，相信我嘅粉絲會乖。」

Ian指姜濤心情開朗

昨日三子在發布會上分享減壓方法，提到隊友姜濤疑壓力爆煲在網上放負，幸好已po新相「報平安」，Edan指姜濤心理狀況OK，Anson則說：「姜濤係遇到壓力要私人空間休息同沉澱嘅人。」Ian笑說：「佢休息完仲開朗過以前！」此外，Ian將於下周三（9日）生日，他表示生日當日要開工度過，問女友盧慧敏有何表示？他說：「我嘅節日感唔係好重，可能簡單食餐飯，相信『生日快樂』都有句嘅！」

採訪︰Pauline

攝影︰林良明

美術：梁政敏