馮素波 做個樂齡快活人

馮素波三歲入行，五歲開始演戲至今達71年。波姐跟其他老戲骨在《踩過界II》的不同單元，同樣演技精準到位。她笑認是「戲骨」但心境永不老，歲數只屬數字遊戲，繼續保持初心向年輕一輩學習，堅守專業，才不負已故藝人及導演爸爸馮峰之名，才不負她這個演員名銜。

由童星開始加入娛樂圈，入行70多年的波姐最討厭人家說娛樂圈的不是。「以前成日講娛樂圈係大染缸，如果負面咁睇就好壞，其實做染缸無乜唔好，今年興黑，出年興白，再嚟迷彩、幻彩都得，總之隨你點樣推出市場。彩虹都五顏六色，點解要用一個貶義詞去形容藝術界呢？」

波姐認為演藝圈集四方八面的英雄在一起，各自發揮天份，入行後背負着藝人之名，就算當年沒有「狗仔隊」監察，每當想做出軌的事情，想到自己的前途、想到公司的形象，自自然然會退縮。「爸爸係名導演，我一定要爭取做好演員，否則點對得住我老竇呢？『七公主』成立之後，操行都好緊要，萬一有事就拖累成個『七公主』。」

馮素波每次在劇集的演出，總是令人拍爛手掌，讓導演和監製非常放心。「三歲做臨時演員賺到幾蚊，五歲拍《細路祥》才正式有個角色，不過我由細到大都鍾意做戲，當年好多人話爸爸唔應該畀我做呢行，現在我好感恩當年佢畀我入行。」波姐從來沒介意角色戲份多寡，亦沒想過要退休，「你唔好當自己係明星咁樣去表現自己，最重要係傳達到個信息。」

活學活用數碼科技

對76歲的波姐而言，「銀齡」只是一個稱呼，年齡只是一個數字。她活躍於Facebook、微博，甚至抖音，沒有半點落伍。「我當自己十幾歲，好後生，同班年輕演員先可以咁好傾。做前輩唔好咁古肅，點完頭就個個後生都走開嘅話，你嘅演出就止於此。我同班後生演員做戲，唔好成日以為我教佢哋嘢，其實佢哋帶好多嘢畀我。」

波姐活到老學到老，並將自己所知的教授同齡「老友記」，更曾經舉辦金曲演唱會，成為繼續幕前工作的一份滿足感。「目前繼續拍戲，賺取嘅係安樂同開心，人嘅壽命幾長無人預計到，既然係未知之數，做得幾多就盡做。」

撰文︰楊安莉

編輯︰陳禮恒

美術︰梁政敏

攝影︰林良明