周秀娜黃宗澤 拍床戲要武指教路

周秀娜與黃宗澤（Bosco）在新劇《非凡三俠》有激烈床戲，他們昨日出席記者會時，自爆拍親熱戲時竟有武術指導在場教路。拍攝前Bosco更與另一男主角張智霖（Chilam）夾計整蠱娜姐，娜姐說：「我被佢哋玩到㷫烚烚！」

周秀娜、黃宗澤、王敏德等昨日宣傳由邵氏新劇《非凡三俠》，劇集今天起在myTV Super上架，本月底於無綫翡翠台播映。有份演出的張智霖、王浩信、高海寧及沈震軒雖然身在北京，但昨日亦在網上開live參與記者會。

娜姐與Bosco重提在劇中的激烈床戲時忍不住大笑，Bosco更說：「我唔明當時拍床上戲，點解會有武指在場。」娜姐自言拍親熱戲相當有經驗：「可能劇組唔知我對拍親熱戲好熟悉，其實不外乎喺床上碌嚟碌去。點知呢一場床戲要彈上張床，我見到現場有武指，都心諗『乜原來咁緊張』。」

Bosco兼任大馬導遊

Bosco透露，與Chilam及編審陳十三在片場不斷整蠱娜姐：「我哋當娜姐好似一件貨品咁，有一場戲我哋自己商量邊個錫娜姐，但完全無同娜姐溝通，無理佢感受。我哋又成日整蠱佢，其實都係想更有默契。」娜姐笑說：「我被佢哋玩到㷫烚烚，其實因為我以前好少拍喜劇，佢哋同我玩都係想熱下身。」

另外，《非凡三俠》在馬來西亞取景，Bosco被監製樂易玲大爆是劇組的投資顧問及康樂組組長，他解釋：「樂小姐係富婆，佢叫我介紹大馬邊度買樓好，咪做下資料搜集。」他笑言拍攝期間，一收工帶劇組四圍品嘗大馬美食，又安排坐直升機觀光，十足導遊。

採訪︰Pauline

攝影︰林良明

編輯：李潔盈

美術：梁政敏