苑瓊丹願包艾威一日三餐

新冠肺炎疫情反反覆覆，不少食店或其他商戶都相繼倒閉，然而計仔多多的苑瓊丹（苑仔）卻嘗試在飲食業突圍。早前她和友人夾份投資熟食餸菜包，希望為無時間煮飯的上班一族帶來福音。苑仔邀請好友艾威到工場參觀，兩人更合力製作餸菜包。

苑瓊丹為生意不惜碌盡人情卡，邀好友拍攝宣傳片，她笑言周身人情債，惟有包老友一日三餐。艾威早前到工場客串做廚房技工，為食物進行加工，但見他的手法非常熟練，艾威自爆經常下廚，因而煮得一手好菜。他表示已趁機落order︰「雖然得一個人食，但可以訂晒一星期餐單，每日食乜都決定晒，幫襯佢仲可以煩少啲。」

艾威表示曾有計劃投資冰鮮雞生意，惟在籌備過程中卻發現困難重重，「我鍾意食嘢，都想學苑仔咁投資飲食業，不過我無資金嘛！早排有叫苑仔『做雞』支持我，係賣冰鮮雞，但發現競爭太大無得做。」苑仔則自爆不敢約艾威食飯：「因為佢次次食飯都要飲幾杯，怕佢飲醉之後會打我就大件事。」

唔敢認富婆

苑仔未有透露今次投資金額，笑言自己不算是富婆，只因為覺得這門生意有得做，她解釋︰「因為疫情關係無得出街，有朋友攞啲餸嚟屋企畀我試食，覺得幾好味就決定入股。其實都要睇時勢去投資，呢類熟食餸包應該有得搞，我負責做宣傳、度蹺，至於煮食、衞生就由拍檔代勞。」

撰文︰Pauline

編輯：陳禮恒

美術：梁政敏