MIRROR小鮮肉不及男友 鄧麗欣認定王子係The One

鄧麗欣（Stephy）與男團MIRROR最近合作ViuTV新劇《男排女將》，Stephy直認拍攝時經常被一眾小鮮肉「口花花」調戲，但她仍然心繫台灣男友邱勝翊（王子），更甜絲絲宣布男友是她的唯一。

鄧麗欣昨日聯同顧定軒、MIRROR成員Ian、Anson Lo、Jer、Edan、Tiger、Alton及Jeremy等，出席《男排女將》記者會。一眾小鮮肉即場與甲一排球隊「力臻」打友誼賽，雖以4:10落敗，但仍獲現場不少掌聲。Stephy在劇中飾演排球教練，提到在MIRROR面前已升呢做姐姐，她笑說：「無問題呀，我都未到演媽媽，就算演媽媽我都接受到，都要面對現實，角色同自身都要成長，要我做番《9個女仔1隻鬼》都唔好意思啦！」

Stephy笑言拍劇期間經常「被仔圍」，她也樂於享受被MIRROR調戲，因感覺似回到校園時：「幾廿年無試過（被調戲）喇，好似中小學時代咁，佢哋開頭扮晒怕醜，後尾熟咗就調戲我，又問我攞電話。」問男友王子可有調戲她？她笑說：「王子唔係呢類型。」一眾小鮮肉中誰有王子的影子？她甜絲絲說：「唔似，佢係The one and the only one。」

陳卓賢露肉滿足粉絲

同場的Jer（柳應廷）今天28歲生日，獲眾兄弟送上蛋糕慶祝。提到MIRROR在劇中不乏露肉片段，Ian（陳卓賢）笑指要滿足觀眾：「要半裸上身，有排球短褲，連過場都要剝衫，露太多喇，我唔係行呢個路綫，平時好保守！」Edan（呂爵安）透露有場沙灘戲只穿肉色內褲，Anson Lo（盧瀚霆）解釋：「因為我哋要扮全裸，我喺肉色底褲入面加咗兩條底褲。」Jer則指隊友中以Tiger（邱傲然）操練得最大隻。

採訪︰Pauline

攝影︰林良明

編輯：李潔盈

美術：梁政敏