翻拍《十月初五的月光》 「Q姨」薛家燕驚唔夠瞓拒演

薛家燕與胡楓（修哥）昨日為《萬千星輝賀台慶》排舞，有傳無綫明年初翻拍經典劇《十月初五的月光》，曾在劇中演「Q姨」的家燕姐透露因撞期辭演，有指角色改由米雪演出，家燕姐大讚對方勁好戲。

薛家燕與胡楓同樣精於跳舞，但家燕姐笑言與「舞王修」合作有壓力，修哥則指跳舞歌曲為草蜢的《華麗舞台》，難度甚高︰「我死咗十億個細胞呀，首歌歌詞好密，每晚瞓覺都喺我腦裏面揮之不去，仲搞到失眠。」

提到無綫明年初翻拍經典劇《十月初五的月光》，曾演「Q姨」的家燕姐坦言公司找她度期︰「佢哋搵我夾明年一月嘅期，但我嗰時真係好忙，如果再就我個期，變咗我無時間瞓覺，呢套係經典劇，如果再演，想畀啲心機拍好佢，但若唔夠瞓就會拍得唔好，我都好可惜。（改由米雪演Q姨？）幾好呀，米雪好好戲。」

支持胡鴻鈞演「初哥哥」

有傳主角「初哥哥」及「君好」，將由胡鴻鈞與何依婷擔正，不過網民反應兩極。家燕姐聞言說︰「公司好肯栽培同畀機會新人，如果接到呢個角色都會好開心，相信佢哋都會畀心機去演，有機會就盡量把握。」

採訪︰倪小珊

攝影︰林良明

編輯︰李潔盈

美術︰Simon