從暴瘦惹揣測 到龍精虎猛受訪 68歲洪金寶︰做唔到先退休

一度暴瘦的「影壇大哥大」洪金寶，日前接受鄭丹瑞（阿旦）的YouTube頻道《健康．旦》訪問，片段中的洪金寶說話時聲如洪鐘，全程手舞足蹈精神奕奕。他除了披露入行半世紀拍攝動作片弄至全身傷痕纍纍，更承認一直享受拍戲未言休︰「當我發覺自己退化晒，費事出醜咪退休！」

68歲的洪金寶雖然身形龐大，但一向身手靈活，拍武打戲都是拼命去演。然而，近年有傳其身體狀況大不如前，曾被網民拍到要坐輪椅到街市買餸。今年五月，譚詠麟在微博po與大哥大飯聚的合照，見到大哥大暴瘦的模樣，惹來影迷擔憂。

久未露面的他，日前亮相阿旦的網上節目，暢談當動作演員的辛酸史，洪金寶全程面色紅潤兼中氣十足，並回帶在76年演出吳宇森執導的古裝片《少林門》時，從兩層樓高撻落地面，差點失禁︰「當時無人肯做呢個動作，自己嚟，跌完後我話：『你唔好郁我！』撻到真係標屎㗎，要忍住唔好講嘢，等啖氣過咗！」

以前唔搏乜都無

他坦言多年來雙手斷過三次，膝蓋亦多次受創，86年拍《最佳福星》亦非常難忘︰「當時我隻手斷咗，即刻去醫院打石膏包紮後再返片場繼續拍，因為我第二日要去加拿大，之後要大特寫拍隻手，就要用替身，做我哋呢行無辦法，我同成龍皆付出身體及生命！」

大哥大坦言仍想繼續拍戲，家人亦「勸佢唔掂」︰「我哋幾十年到而家都係咁，由老婆（高麗虹）識我到而家，生活呀、食呀都係由我搏返嚟，如果以前唔搏就乜都無！我而家唔係唞，遲啲可以『長唞』！」他形容經常被身邊的人勸退休，但自己卻想繼續拍戲︰「第一，我仲講到嘢、鬧到人；第二，我諗到嘢又講到，點解我要退休？上天賜畀我呢啲，當覺得自己退化晒，費事出醜咪退休。我真係做唔到先會退休，而家仲有機會，我都想盡量做。」

阿旦問他現時可有運動，大哥大坦言若開新戲才會考慮運動︰「因為拍一take可能百幾次NG會無氣，所以到時要做運動，練習靈活性及反應！」至於網友皆大讚其專業精神令人敬佩；有影迷亦讚其心態充滿正能量要畀Like。

撰文︰Steven

編輯︰陳禮恒

美術︰Simon