林嘉欣爆囡囡係公主控

林嘉欣最近應迪士尼樂園邀請，以甜到漏的聲綫，演出「奇妙夢想城堡導賞之旅」導航，用廣東話、英語及普通話帶賓客遊歷。嘉欣笑言四月錄音時，城堡仍未開幕，只能靠設計圖及文字介紹，再加上自己的想像，完成錄音工作：「隔咗幾個月，城堡就快開幕，我同創作團隊好似十月懷胎，好快就見到BB出世一樣。」

錄音前，嘉欣特地重溫13個迪士尼公主及女王的故事：「錄音之前，我成日喺屋企練習，最大挑戰係叫兩個囡囡保守我錄音嘅秘密。因為佢哋好鍾意迪士尼公主，好熟公主故事，當佢哋知道我錄音導航，開心到興奮尖叫，話要同同學分享，所以我要提醒佢哋呢個係最高機密，一定要保守秘密！」