大女Chantelle已開學 郭富城盼早日正常上課

郭富城及導演黃慶勳前晚到銅鑼灣出席《麥路人》特別場，城城不介意在疫情下密密做宣傳，影相時甚至一度除下口罩，他表示：「我熱愛電影，唔理咁多啦。」城城亦希望疫情盡快過去，小朋友可以正常上課，大人能夠如常上班。

電影《麥路人》取材自社會中一群流連24小時快餐店的無家者，上映五天已突破300萬元票房，觀眾反應熱烈，電影公司將展開多場謝票行動答謝觀眾。而前晚舉辦了「麥當勞專場」，讓快餐店前綫員工一齊捧場，郭富城表現風騷，並跟觀眾分享感受。

在疫情下為電影緊密宣傳，可會擔心增加感染風險？城城直言︰「我熱愛電影，唔理咁多啦。呢部戲係我從影以來最鍾意嘅頭三位，所以都唔介意喺任何情況下宣傳，希望更多人入戲院睇呢部戲。」提到戲院重開後，始終仍受限聚令影響入座率，城城表示新片有此成績已相當不俗，令他鬆一口氣。

學校新學期已陸續開學，城城的大女Chantelle今年入讀幼兒班，他表示︰「大女已經返咗一日學，不過每星期只會返一堂實體班，其餘時間都係網上授課。其實小朋友返學校上課係最好，希望疫情盡快過去，小朋友可以喺安全嘅環境下返學上堂，大人亦可以如常工作。」

水喉匠睇戲睇到喊

城城又自爆日前家中浴室的水喉壞了，請水喉匠到家中維修，年約50多歲的師傅主動跟他表示有捧場睇戲，更被戲中鮑起靜與城城的母子情感動落淚，令城城覺得十分鼓舞。此外，城城目前忙於拍攝另一新戲《斷網》，他相信好朋友都會「自動波」捧場睇《麥路人》，還說太太方媛已睇了幾次，她會叫朋友包場睇戲。

採訪︰Pauline

攝影︰林良明

編輯：陳禮恒

美術：梁政敏