拍完《刑偵日記》戲份 惠英紅認有脾氣予人壓力

惠英紅（紅姐）前年返無綫拍重頭劇《鐵探》，終於憑萬晞華一角大熱勇奪首個視后寶座。縱然曾表示拍劇通街跑很辛苦，紅姐仍對拍劇大感興趣，今年與同一班底再合作新劇《刑偵日記》，劇組日前已完成紅姐的戲份，她不忘答謝台前幕後，說時感到依依不捨！

惠英紅與王浩信在劇集《刑偵日記》飾演兩母子，兩人都患有精神分裂，甚考演技。紅姐日前在天台煞科，監製關樹明送上一大束鮮花向她致謝，紅姐一度眼濕濕，並企上木箱跟台前幕後大講感受，「兒子」王浩信即細心在旁扶實，之後其他演員姜皓文、陳煒、黃智雯及黎諾懿等，亦紛紛上前跟紅姐拍照留念。

含淚跟劇組道別

紅姐表示︰「親愛的！今次真係同大家合作得好開心，我可能有好多歇斯底里嘅戲，令到大家覺得我有少少難受，但我希望大家唔好介意，我有時係有少少脾氣，希望大家明白，我其實係好愛你哋。今次睇到大家好團結，有時我拍其他戲，見到有演員互相鬥爭，互相食（搶）戲，或者大家hea，但我今次見唔到，係真嘅。」

提到紅姐在場很受大家歡迎，她卻表示︰「我係現場唔太講嘢嘅人，可能大家覺得我臭口臭面，但我唔係嘅，如果嗰場戲唔係咁認真，我唔會咁樣。（剛才眼濕濕？）因為今次真係好辛苦，有好多呢啲（歇斯底里）戲，有時會催大家可唔可以快啲，因為驚個情緒走咗，所以係加重大家壓力，見到大家有壓力又唔可以NG、唔可以錯，其實真係有啲唔捨得，但我又好開心，因為我殺青喇。」說罷，台前幕後即場為紅姐拍掌歡呼，場面感人。

撰文︰Pauline

編輯︰陳禮恒

美術︰梁政敏