《反黑路人甲》複製經典多笑點 監製林志華︰嚟緊集集都有

無綫劇《反黑路人甲》前晚首播，扮演戲癡張細倫的王浩信，登場不久即露兩手，一幕「試戲」大嗌「So What！」向前輩萬梓良致敬，配上《婚紗背後》的背景音樂，令很多劇齡不淺的觀眾爆Like，監製林志華昨日回覆《晴報》稱︰「所有致敬戲都係配合劇情，希望大家睇得過癮！」

該劇的宣傳片早已穿插多齣經典電影或劇集的難忘場面，前晚打頭陣有王浩信與高海寧（Angel姐）化身《流氓大亨》的萬梓良及鄭裕玲，重演結局一場男方面對昏迷愛人的獨腳爆Seed戲。至於張振朗繼《全職沒女》後，再次全裸上陣拍逃跑戲，加上第一次擔正無綫劇的湯怡在鏡頭前露Bra Top，果然幕幕吸睛。此外，首集極速交代主要角色的關係及性格，節奏尚算明快。

對於向萬梓良及鄭裕玲致敬，監製林志華直認不諱︰「劇情是交代高海寧嬲咗王浩信呢個戲癡，所有致敬戲都係配合劇情推進！（每隔幾日就有致敬戲？）宣傳片已經出咗幾段，其實集集都有，因為主角細倫係戲癡，今次特登玩呢樣嘢，以前比較少玩！將搞笑元素擺喺臥底身上！」

少談倫理節奏快

問到致敬戲是否刻意吸引港產片影迷追劇，林志華稱︰「有睇過舊戲嘅就識會心微笑，後生仔無睇過就當獨立新嘢去睇！（首集節奏明快？）我特別要求編劇咁做，盡量少啲倫理嘢！」他特別讚揚王浩信演活角色︰「佢比平時付出多。整套劇以佢為主導，比平時要更用腦及精神去演！」

談及第一集已有露肉場面，林志華笑言︰「呢齣劇多靚女，主要想勸人唔好醉酒做錯事，其實好耐無呢類瘋狂喜劇，希望大家笑完一個鐘，十點半放鬆完就瞓覺！」

撰文︰Steven

編輯︰黃寶恩

美術︰Simon