爆黃翠如中「愛的迫降」 蕭正楠被迫扮玄彬

蕭正楠、陳展鵬、袁偉豪及譚俊彥，前晚為《博愛歡樂傳萬家》表演，齊齊獻唱「四大天王」的金曲。蕭正楠一身「玄彬Look」現身，他大爆老婆黃翠如迷上韓劇《愛的迫降》，因而被迫扮成男神玄彬現身。

歌手出身的蕭正楠，前晚獻唱張學友金曲《怎麼捨得你》，他笑指歌曲由黃翠如點唱：「我喺屋企練歌，佢（翠如）跟住唱，但又唱錯歌詞，我叫佢唔好喺隔籬唱，搞到我上台唱錯唯佢是問。」

阿蕭大爆翠如早前沉迷玄彬及孫藝珍主演的《愛的迫降》，又指自己前晚一身玄彬打扮，正是翠如硬要安排他穿着：「佢（翠如）話我個髮型一定要見眼眉，因為玄彬頭髮好短。我唔會抗拒嘅，因為我都有睇呢部劇。」問他可有當翠如是女主角孫藝珍？他搞笑說：「我話佢係『酸菜珍』，佢就話我係『玄彪』。」他表示目前仍是休息狀態，下月才正式拍攝新劇《濟公》，而翠如下月亦會開拍另一套新劇，所以兩夫婦均正為新劇準備。

同場的陳展鵬表演郭富城《愛的呼喚》，他笑言下次想挑戰跳舞歌，但需要時間練習。他指太太單文柔喜歡Twins，不太熟四大天王的歌，又笑說：「囡囡有聽我練歌，仲跟住我唱，又郁嚟郁去跳舞，我就變咗傻仔咁逗囡囡開心。」

陳展鵬表示早前開工開足三個月，結果囡囡不認得他：「我行埋去個女就想喊，直到呢排疫情關係，多咗時間留喺屋企，所以『修復』番父女關係。」提到女兒下月將一歲生日，他坦言會視乎疫情，才決定是否為囡囡舉行生日會，但老婆一定會為囡囡親手焗製生日蛋糕。

撰文︰Pauline

編輯：李潔盈

美術：梁政敏